បើនិយាយដល់ប្លុកមនុស្សភាគច្រើនក៏ដូចជាខ្ញុំច្រើនតែស្គាល់ Blogger និង
Wordpress។ Blogger និង Wordpress មានទាំងគុណសម្បត្តិ
និងគុណវិបត្តិរបស់វារៀងៗខ្លួន អាស្រ័យទៅលើការប្រើ។ ចំពោះខ្ញុំ
ខ្ញុំចេះប្រើទាំងពីរ តែប្រហែលជាជំនាញ Blogger ជាង។ ទោះបីជា Wordpress
មានលក្ខណៈពិសេសប្លែកក៏ដោយ សម្រាប់មនុស្សសាមញ្ញដូចខ្ញុំ ប្រើ Blogger
(ប្លុកករ) ល្អច្រើនជាង។ ផ្ទុយមកវិញ សម្រាប់អ្នកដែលប្រើ Wordpress មានការយល់ឃើញផ្សេងដោយឡែកពី
ខ្ញុំដែលប្រើ Blogger។ ទោះជាយ៉ាងណាក្ដី ក៏ខ្ញុំនឹងសរសេរអត្ថបទមួយ
បង្ហាញឲ្យឃើញថា Blogger ល្អប្រសើរជាង Wordpress ដែលនៅក្នុងនោះមាន ១០ ចំណុច។
១/. ជាសេវា ឥតគិតថ្លៃ ៖ ប្លុកករ (Blogger) ជាសេវាបង្ហោះឥតគិតថ្លៃរបស់ Google ដែលមិនបានតម្រូវឲ្យអ្នកបង់ប្រាក់សូម្បីតែមួយកាក់មួយសេន និងមានសុពលភាពមួយជីវិត។ នេះហើយគឺជាគុណប្រយោជន៍ដ៏ធំធេងណាស់ ដែលអ្នកមិនចាំបាច់ត្រូវបង់ប្រាក់ជារៀងរាល់ឆ្នាំឡើយ ប្រសិនបើអ្នកបង្កើតវាសម្រាប់តែសរសេរកំណត់ហេតុជីវិតតូចតាច (សម្រាប់អ្នកចង់បាត់ Domain.blogspot. ត្រូវបង់ប្រាក់ 10$/1ឆ្នាំ សម្រាប់ប្រទេសកម្ពុជារបស់យើង សម្រាប់ប្រទេសផ្សេង ខ្ញុំក៏អត់បានដឹងដែរទេ :D)។
២/. ភាពទុកចិត្តបាន ៖ Blogger ជារបស់ Google ដែលជាក្រុមហ៊ុន ដ៏ធំមួយដែលយើងអាចទុកចិត្តបាន។ Google ជាក្រុមហ៊ុនដ៏ធំ និងដ៏កំពូលគេក្នុងពិភពលោក ដែលមានអ្នកទស្សនា ច្រើនជាងគេបង្អស់។ ក្រុមហ៊ុនរបស់ពួកគេមានបុគ្គលិករាប់ពាន់នាក់ និងមាន Server ផ្ទាល់ខ្លួនរបស់ពួកគេ។ ដូច្នេះហើយ សម្រាប់យើងជាអ្នកប្រើ គឺមិនចាំបាច់ព្រួយបារម្ភអ្វីទាំងអស់។
៣/. មាន Template (ស្បែកប្លុក) ឥតគិតថ្លៃ រាប់រយ រាប់ពាន់ ៖ លោកអ្នកអាចទាញយក Template ស្អាតរបស់ Blogger បានដោយមិនគិតប្រាក់ និងស្អាតៗទៀតផង។ អ្វីដែលសំខាន់ជាងនេះ បើសិនជាលោកអ្នក អាចទាំងកែកូដបានតាមចិត្ត (សម្រាប់អ្នកយល់ដឹងច្រើន អំពី កូដ CSS និង HTML មានភាពងាយស្រួលក្នុងការរចនា ប្លុកជាងយើងអ្នកអត់ចេះ)។ ឬម្យ៉ាងវិញទៀត លោកអ្នកអាចទាក់ទង ស្នើរសុំទៅកាន់អ្នកជំនាញ ខាងធ្វើ Template ប្លុក ឲ្យគេជួយធ្វើឲ្យ ដោយលោកអ្នកគ្រាន់តែ បង់ប្រាក់ឲ្យគេបន្តិចបន្តួចតែប៉ុណ្ណោះ។ លោកអ្នកអាចផ្លាស់ប្ដូរ Template របស់ប្លុកដោយចំណាយពេល តិចតួចបំផុត គឺសឹងតែមិនដល់មួយនាទីផង។
៤/. មានសុវត្ថិភាពខ្ពស់ ៖ បើតាមដែលខ្ញុំធ្លាប់បានដឹង ប្រភេទ CMS ផ្សេងៗ ដែលមាន ដូចជា Joomla ឬ Wordpress នៅតែមានចន្លោះប្រហោង ដែលនាំឲ្យអ្នកដែលមានបំណងមិនល្អ អាច exploit ចូលបាន តាមរយៈ Bug ថ្មីៗ ដែលគេបានចេញ។ ដូចនេះ ហើយសម្រាប់អ្នកដែលគ្រប់គ្រង Wordpress ឬ Joomla គឺត្រូវតែរវល់ជាមួយនឹងការ អាន កូដ Bug ថ្មីៗ ដែលគេបានចេញមក ហើយត្រូវការពារ និងត្រៀមខ្លួនជាប្រចាំ។ ខ្ញុំនិយាយនេះ មិនមែនបង្អាប់ Wordpress ឬ CMS ប្រភេទដ៏ទៃទេ។ ងាកមកមើល Blogger វិញ គឺវាមិនងាយមាន Bug (ចន្លោះប្រហោង) ទេ ព្រោះថា វាជាផលិតផលរបស់ Google ដោយលោកអ្នកគ្រាន់តែរក្សា Gmail របស់លោកអ្នកដោយមិនធ្វេសប្រហែស ទៅបានហើយ។
៥/. ល្អសម្រាប់អ្នកដែលទើបនឹងរៀនសរសេរប្លុក ៖ សម្រាប់អ្នកដែលទើបនឹងរៀនសរសេរប្លុក លោកអ្នកអាចប្រើ Blogger បាន ដោយមិនចាំបាច់ចេះកូដ ឬចេះអ្វីឲ្យធំដំទេ ព្រោះថា វាមិនខុសអ្វីប៉ុន្មានពីការប្រើ កម្មវិធីការិយាល័យឡើយ។
៦/. ងាយស្រួលក្នុងការសរសេរ ៖ នៅក្នុង Blogger លោកអ្នកអាចជ្រើសរើសការសរសេរ ដោយសរសេរតាមបែបធម្មតា ដូចក្នុងកម្មវិធីការិយាល័យក៏បាន ហើយលោកអ្នកអាចជ្រើសរើសក្នុងការសរសេរតាមបែប HTML Code ក៏បាន។ ដូចនេះ ហើយ អ្វីដែលសំខាន់លោកអ្នកគ្រាន់តែរៀនស្វែងយល់ឲ្យបានច្បាស់ជាមួយ នឹង HTML ក៏បាន។ ហើយ កូដ HTML នេះមិនពិបាកក្នុងការរៀនឡើយ។
៧/. បង្កើនសមត្ថភាពស្វែងរក (SEO) នៅលើ Google ៖ ដូចរៀបរាប់ខាងដើមរួចមកហើយ ថា Blogger ជារបស់ក្រុមហ៊ុន Google។ ដូចនេះហើយ Google នឹងជួបជម្រុញឲ្យប្លុករបស់លោកអ្នកមានវត្តមាន កាន់តែខ្លាំងក្លា ក្នុងការស្វែងរកនៅលើគេហទំព័ររបស់គេ (Google.com) ដែលជាគេហទំព័រដ៏ធំមួយ។
៨/. អ្នកនឹងទទួលបានបទពិសោធន៍ដោយមិនចាំបាច់អស់លុយ ៖ នៅពេលដែលចាប់ផ្ដើមជាមួយនឹងការសរសេរប្លុក លោកអ្នកនឹងមិនទាន់បានដឹងសោះ អំពីការប្រើប្រាស់ គេហទំព័រ ឬប្លុក។ ដូច្នេះ តាមបទពិសោធន៍របស់ខ្ញុំផ្ទាល់ ៖ "កាលដំបួូងឡើយ ខ្ញុំត្រឹមតែចេះ ឆែកអ៊ីនធឺណេត និងចេះប្រើកម្មវិធីការិយាល័យតិចតួចបំផុត ពិសេសគឺសរសេរអក្សរខ្មែរ (Typing) យឺតណាស់"។ តែក្រោយពីខ្ញុំបានចាប់ផ្ដើមស្វែងយល់ និងខិតខំសរសេរប្លុក, កែកូដ, រចនាប្លុក និងស្វែងយល់ពីគន្លឹះនានា "ខ្ញុំមិនដែលរៀន CSS ទេ គឺធ្លាប់តែរៀន HTML ប៉ុណ្ណោះ" តែខ្ញុំបានចេះ ដោយសារតែការសរសេរប្លុក។
៩/. ការត្រួតពិនិត្យទៅលើ SPAM ៖ ខ្ញុំមិនសូវជាបានដឹងប៉ុន្មានទេនៅក្នុងផ្នែកនេះ។ ទោះយ៉ាងណា ខ្ញុំធ្លាប់ឮគេនិយាយថា អ្នកដែលប្រើ Wordpress ត្រូវបង់ការចំណាយរបស់ពួកគេ ក្នុងការត្រួតពិនិត្យសារ ដែលឥតបានការ (SPAM)។ ងាកមក Blogger វិញ គឺវាមានសមត្ថភាពនេះ ដោយស្វ័យប្រវត្តិ ដោយមិនអស់សូម្បីមួយសេន។
១០/. សន្តិសុខ ៖ Blogger ជារបស់ Google។ តើយើងអាចទុកចិត្តបានកម្រិតណាចំពោះ Google។ បាទ! វាសឹងតែមួយរយភាគរយទៅហើយ ព្រោះថា វាត្រូវបានការពារដោយ Google។ ដូច្នេះ ការរាំងខ្ទប់ ពីការវាយប្រហារគឺមិនមានជាបញ្ហាទេសម្រាប់អ្នកសរសេរប្លុក។ អ្វីដែលសំខាន់ ក៏ដូចជា ដំបូន្មានសម្រាប់អ្នក ៖ "បើអ្នក សរសេរកំណត់ហេតុមួយដ៏ល្បី គឺតែមាន Wifi ផ្ទាល់ខ្លួន និងមិនបើ Wifi Free ដែលមិនដឹងទីតាំងពិតប្រាកដ" ដោយហេតុថា ឥឡូវនេះ គេអាចបង្កើត ជាប្រភេទ Free Wifi ដែលអនុញ្ញាតឲ្យយើងប្រើដោយមិនគិតថ្លៃ តែធាតុពិត នៅពេលដែលយើង Login គេបានទទួល Email និង Password យើងបានដោយជោគជ័យបាត់ទៅហើយ។ជាយោបល់បញ្ចប់ ការសរសេរទាំង 10 ចំណុចរបស់ខ្ញុំដែលបង្ហាញខាងលើនេះ នឹងបានផ្ដល់ជាប្រយោជន៍ ក៏ដូចការលើកទឹកចិត្តចំពោះលោកអ្នកដែលងប់ងុល នឹង Blogger ផងទៅចុះ។
0 ចំនួនមតិ: